Aristophanes, Frogs (XML Header) [genre: poetry; drama; comedy] [word count] [Ar. Ran.].
<<Ar. Ran. 455 Ar. Ran. 460 (English) >>Ar. Ran. 503

Διόνυσος 460ἄγε δὴ τίνα τρόπον τὴν θύραν κόψω; τίνα;
πῶς ἐνθάδ’ ἄρα κόπτουσιν οὑπιχώριοι;
Ξανθίας οὐ μὴ διατρίψεις, ἀλλὰ γεύσει τῆς θύρας,
καθ’ Ἡρακλέα τὸ σχῆμα καὶ τὸ λῆμ’ ἔχων.
Διόνυσος παῖ παῖ.
Αἴακος τίς οὗτος;
Διόνυσος Ἡρακλῆς καρτερός.
Αἴακος
465 βδελυρὲ κἀναίσχυντε καὶ τολμηρὲ σὺ
καὶ μιαρὲ καὶ παμμίαρε καὶ μιαρώτατε,
ὃς τὸν κύν’ ἡμῶν ἐξελάσας τὸν Κέρβερον
ἀπῇξας ἄγχων κἀποδρὰς ᾤχου λαβών,
ὃν ἐγὼ ’φύλαττον. ἀλλὰ νῦν ἔχει μέσος·
470τοία Στυγός σε μελανοκάρδιος πέτρα
Ἀχερόντιός τε σκόπελος αἱματοσταγὴς
φρουροῦσι, Κωκυτοῦ τε περίδρομοι κύνες,
ἔχιδνά θ’ ἑκατογκέφαλος, τὰ σπλάγχνα σου
διασπαράξει, πλευμόνων τ’ ἀνθάψεται
475Ταρτησία μύραινα· τὼ νεφρὼ δέ σου
αὐτοῖσιν ἐντέροισιν ᾑματωμένω
διασπάσονται Γοργόνες Τειθράσιαι,
ἐφ’ ἃς ἐγὼ δρομαῖον ὁρμήσω πόδα.
Ξανθίας οὗτος τί δέδρακας;
Διόνυσος ἐγκέχοδα· κάλει θεόν.
Ξανθίας
480 καταγέλαστ’ οὔκουν ἀναστήσει ταχὺ
πρίν τινά σ’ ἰδεῖν ἀλλότριον;
Διόνυσος ἀλλ’ ὡρακιῶ.
ἀλλ’ οἶσε πρὸς τὴν καρδίαν μου σφογγιάν.
Ξανθίας ἰδοὺ λαβέ, προσθοῦ.
Διόνυσος ποῦ ’στιν;
Ξανθίας χρυσοῖ θεοὶ
ἐνταῦθ’ ἔχεις τὴν καρδίαν;
Διόνυσος δείσασα γὰρ
485ἐς τὴν κάτω μου κοιλίαν καθείρπυσεν.
Ξανθίας δειλότατε θεῶν σὺ κἀνθρώπων.
Διόνυσος ἐγώ;
πῶς δειλὸς ὅστις σφογγιὰν ᾔτησά σε;
οὐκ ἂν ἕτερός γ’ αὔτ’ ἠργάσατ’ ἀνήρ.
Ξανθίας ἀλλὰ τί;
Διόνυσος κατέκειτ’ ἂν ὀσφραινόμενος, εἴπερ δειλὸς ἦν·
490ἐγὼ δ’ ἀνέστην καὶ προσέτ’ ἀπεψησάμην.
Ξανθίας ἀνδρεῖά γ’ Πόσειδον.
Διόνυσος οἶμαι νὴ Δία.
σὺ δ’ οὐκ ἔδεισας τὸν ψόφον τῶν ῥημάτων
καὶ τὰς ἀπειλάς;
Ξανθίας οὐ μὰ Δί’ οὐδ’ ἐφρόντισα.
Διόνυσος ἴθι νυν ἐπειδὴ ληματίας κἀνδρεῖος εἶ,
495σὺ μὲν γενοῦ ’γὼ τὸ ῥόπαλον τουτὶ λαβὼν
καὶ τὴν λεοντῆν, εἴπερ ἀφοβόσπλαγχνος εἶ·
ἐγὼ δ’ ἔσομαί σοι σκευοφόρος ἐν τῷ μέρει.
Ξανθίας φέρε δὴ ταχέως αὔτ’· οὐ γὰρ ἀλλὰ πειστέον·
καὶ βλέψον ἐς τὸν Ἡρακλειοξανθίαν,
500εἰ δειλὸς ἔσομαι καὶ κατὰ σὲ τὸ λῆμ’ ἔχων.
Διόνυσος μὰ Δί’ ἀλλ’ ἀληθῶς οὑκ Μελίτης μαστιγίας.
φέρε νυν ἐγὼ τὰ στρώματ’ αἴρωμαι ταδί.


Aristophanes, Frogs (XML Header) [genre: poetry; drama; comedy] [word count] [Ar. Ran.].
<<Ar. Ran. 455 Ar. Ran. 460 (English) >>Ar. Ran. 503

Powered by PhiloLogic